म फुटपाथ हुँ
मलाई टेकेर धेरै यात्रुहरु
गन्तब्यमा पुगिसके
अझै कति मैमाथि टहलिरहेछन।
सडकका दुई किनारमा
बर्षौंदेखि लमतन्न सुतिरहेको छु म
मैमाथी प्रदर्शन भईरहेछन
थरिथरिका झाँकीहरु।
देख्छु बीच सडकमा कुदेका
चिल्ला कारहरु
धुवाँ पुत्याउँदै सकी नसकी
गुडीरहका थोत्रा बसहरु
बत्तीको पुतली झैं
बत्तिरहेका मोटरसाइकलहरु।
पोहोर साल भव्य सम्मेलन
यतै भएको थियो क्यार
कुनै राजनीतिक दलको
यसपाली पनि यतै बस्यो
सभा सहकारी पीडितको
बार्गेनिङ् यतै चल्यो
रथयात्रा यतै ढल्यो।
खोई कसैलाई किन भएन
महानगरको कारबाही?
मेरै काखमा लुटपुटिएर
विहान बेलुका निर्दोष
केटाकेटीको मुखमा
माड हाल्न ठेला ठेल्ने
ठूलीको पो उठीबास भयो रे।
म फुटपाथ हुँ।
मलाई केही थाहा छैन।
तर म सबै घटना परिघटनाको
साक्षी बसेको छु।
