बालक र नक्सा

बालकलाई नक्सा के थाहा?

सीमाना भनेको के हो?

देश भनेको के हो?

नागरिकता भनेको के हो?

उसलाई त यति मात्र थाहा छ कि

टेबिलमाथिको ग्लोब होइन

खालि एउटा भकुण्डो हो

भित्तामा टाँसिएको नक्सा होइन

त्यो त खेलौना बनाउने

कागजको एक टुक्रा हो।

कहाँ टेक्न हुन्छ?

कहाँ टेक्न हुन्न?

यो जमिन कस्को हो?

त्यो आकाश कस्को हो?

उसलाई केही थाहा छैन

उसको लागि त

सारा जमिन आफ्नो हो

अनि त्यो बादलमाथिको

पूरै नीलो आकाश हाम्रो हो।

हरियो रंग जंगल हो

नीलो रंग पानी हो

राता पहेंला पुतलीजस्ता

यी ठूला र साना देशहरु हुन्

यी ठाडा धर्काहरु देशान्तर हुन्

यी तेर्सा रेखाहरु अक्षांश हुन्

बालक सुन्न चाहँदैन

यस्ता बनावटी कुरा

किनकी उसको लागि

यो पृथ्वी हाम्रो हो

यो घर हाम्रो हो।