भूकम्प आउनु अघिसम्म
भूकम्प आउँदा खाटमुनि लुक्नू
भनेर सिकाइयो
खाटमुनि लुकेकाहरु
जब अकालमै मरे
सरकारले भन्यो,
भूकम्प आउन सक्छ
घरबाहिर बस्नू
खालि चउरमा
त्रिपालमुनि।
फेरि कोरोना आयो
चिउँडोमा मास्क लगाएर
सरकार भन्दैछ,
घरभित्रै बस्नू
बाहिर ननिस्कनू
निस्क्यौ भने खोरमा हाल्छु
भोकले मरे बरु
पछि किरिया खर्च दिउँला
तर कोरोनाले नमर्नू।
धन्न, भूकम्प र कोरोना
सँगसँगै आएनन्
आएको भए
सायद सरकारले भन्थ्यो होला
सतर्क पोजिसनमा
दैलोठेलोमै बस्नू
कोरोनाले झस्काए घरभित्र पस्नू
भूकम्पले तर्साए बाहिर टाप कस्नू।
कठै, भोकले मुर्च्छित जनता
कसको आदेश पालना गरून्
सरकारको कि पेटको?
