एउटा साधारण चिठी
जहाँ लेखिएको छ,
“महाशय, तपाईलाई
फलानो पदमा
फलानो मितिदेखि
नियुक्त गरिएको छ”,
तर सोच्नूस् त
नियुक्ति पत्रको
यो एउटा पानाभित्र
कति धेरै जिम्मेवारी,
दायित्व र आशाले
यो भरिएको छ?
(१)
हुन त केही होइन
यो नियुक्ति पत्र
जागिर खाने मेलो हो
भन्नेहरु पनि छन्,
कठीन परिश्रम र संकल्पको फल
यसलाई भाग्यको खेलो हो,
भन्नेहरु पनि छन्
त्यसै केही नगरी
नियुक्ति पत्र हेरेर
केवल अवकाशका दिनहरु
गन्नेहरु पनि छन्
तर सम्झनूस त, महाशय
सेतो पानामा
काला अक्षरहरुले
पोतिएका यी हरफहरुमा
तपाईप्रति राज्यको
कति ठूलो लगानी छ?
घोत्लिनूस् त
यो प्रणाली बसाल्नुमा
हाम्रा पूर्वजहरुको
योग्यता र दूरदर्शीताको
कति घतलाग्दो कहानी छ?
(२)
दया लाग्छ, कतिले
यही नियुक्ति पत्र भजाएर
बजारमा अदृष्य राज गरेका छन् रे
अलौकिक, सर्वगूणसम्पन्न बनेर कतिले
यसको चरम दुरुपयोग गरेका छन् रे
तर, याद राख्नूस महाशय
यो नियुक्ति पत्र निशर्त होइन, सशर्त हो
बाटो बिराए हजूरले कुनै दिन
यो खोसिन पनि सक्छ,
कर्कलाको पानी जस्तै हो,
थाहै नपाई पोखिन पनि सक्छ,
कागजको पाना न हो
आफ्नै पसिनाले ओसिन पनि सक्छ
यसलाई जोगाएर राख्नूहोला।
(३)
नियुक्ति पत्र
जो थमाइएको छ, तपाईलाई
व्यावसयिक बन्नूहोला,
व्यवसाय नगर्नूहोला,
यसलाई सम्झेर
कार्यथलोमा, नयाँ नयाँ
कार्यशैली प्रदर्शन गर्नूहोला
बदनामीको थैली नभर्नूहोला,
महाशय, तपाईलाई शूभकामना छ
तपाई बन्नूहोला
विकासको सम्बाहक
समृद्धिको सारथी
र सुशासनको पर्याय,
जानेर वा नजानेर
यसलाई हतियार ठानेर
कहिल्यै नहान्नूहोला,
नागरिकको सेवा खातिर
सरकारले दिएको
तपाईको नियुक्ति पत्र
तपाई सेवा निवृत्त भएर
नागरिक जीवनमा फर्कने दिन
सरकारलाई नै फिर्ता गर्नुपर्ने
एउटा नासो ठान्नूहोला।
(४)
महाशय,
तपाईले आज
जुन प्रतिष्ठा पाउनुभएको छ
यो नियुक्ति पत्रको कारणले
कृपया यसको पनि
ईज्जत गर्न सिक्नू है,
बेच्नू आफ्नो सीप र पसिना
तर तपाई आफैं नबिक्नू है
कागजको खोस्टो
एउटा साधारण नियुक्ति पत्र
जसले तपाईलाई यति धेरै
विश्वास गरेको छ
उसैलाई अविश्वास नगर्नू है
लामो छ इतिहास
बृत्तिविकासको
तपाई अल्पायूमै नमर्नू है।
(५)
