पशुपति परिसरमा
साँझ आरती गरेको बेला
भक्तजनले गाएको गीत
खै, के भजन भन्नु!
बौद्ध गुम्बामा
भिक्षुहरुले ध्यान गर्दा
बजेको शान्ति ध्वनि
ओम् मणि पद्मे हुँ
त्यो पनि भजन हो?
जामे मस्जिदमा
अल्लाहको नाम पुकार्दै
भक्तहरुले कुरान पढ्दा
त्यसमा पनि भजन छ र?
गाउँको चर्चमा
प्रत्येक आइतबार
ईशुको प्रार्थाना चल्दा
त्यहाँ पनि भजन गाइन्छ र!
भजन त हामी सुन्छौं
विहान बेलुका
सरकारी सञ्चार माध्यममा
सिन्को नभाँच्ने नेताहरुले
यसो भन्नुभयो।
उसो भन्नुभयो।
असली भजन!
भूकम्प आउनु अघिसम्म
भूकम्प आउँदा खाटमुनि लुक्नू
भनेर सिकाइयो
खाटमुनि लुकेकाहरु
जब अकालमै मरे
सरकारले भन्यो,
भूकम्प आउन सक्छ
घरबाहिर बस्नू
खालि चउरमा
त्रिपालमुनि।
फेरि कोरोना आयो
चिउँडोमा मास्क लगाएर
सरकार भन्दैछ,
घरभित्रै बस्नू
बाहिर ननिस्कनू
निस्क्यौ भने खोरमा हाल्छु
भोकले मरे बरु
पछि किरिया खर्च दिउँला
तर कोरोनाले नमर्नू।
धन्न, भूकम्प र कोरोना
सँगसँगै आएनन्
आएको भए
सायद सरकारले भन्थ्यो होला
सतर्क पोजिसनमा
दैलोठेलोमै बस्नू
कोरोनाले झस्काए घरभित्र पस्नू
भूकम्पले तर्साए बाहिर टाप कस्नू।
कठै, भोकले मुर्च्छित जनता
कसको आदेश पालना गरून्
सरकारको कि पेटको?
छोडेर जानुछ कुनै दिन
यो सुन्दर धर्ती
टाढा कतै क्षितिजमा
विलाएर जानेछ सायद
यो प्राण पखेरु
आफ्ना, आफन्त, साथीभाइ
सबैलाई चटक्क छोडेर
जानुछ एक्लै सायद
एक अनन्त यात्रामा।
रहनेछैन कुनै
धन सम्पत्ति
ऐस आराम
मोज मज्जाको जिन्दगी,
भेटिनेछ सायद
एक अन्धकार
एक निराकार
एक महाशून्यता।
सम्झना छोडेर
यो माया ममताको
याद लिएर असीम
पुग्नुछ सायद कतै
गन्तब्यबिनाको
एक महाप्रस्थानमा
सम्झेलान् कोहीले
कुनै दिन लगाएको भए
एउटा गुन जानी नजानी
बिस्तारै बिस्तारै
बिर्सेलान् फेरि उनैले।
समयको चक्रसँगै
फेरिएलान ऋतुहरु
घुमिरहला यो पृथ्वी
अध्याँरो यो धर्तीमा
उज्यालो छरिरहलान
चन्द्र सूर्यले
प्राणवायु दिइरहलान्
यी बुट्यानहरुले
हामी नभए पनि
चलिरहला यो दुनियाँ।
हामीले छोडेर गएको
यो सुन्दर संसार
सायद स्मृतिको
पर्खाल बाहिरै रहला
नपाउँला हामीले
यी फुलहरुको
बास्ना थाहा पाउन
त्यसैले साथी आऊ
यो जीवन रहँदै
उत्सव मनाऔं
हामीले मनाउन बाँकी रहेको
हाम्रो मृत्युको एउटा उत्सव पनि
हामी यो जीवन छँदै मनाऔं।
बाटोवारिको
रेष्टुराँमा खाजा खाँदा
दुई शय रुपैंयाको मःमः लाई
दुई शय पचास तिर्छौं हामी,
कर, सेवा शुल्क
अनि वेटरलाई टिप्स समेत दिन्छौं।
बाटोपारीको
मकै पोल्ने आमासँग
पच्चीसको मकैलाई
पन्ध्रमा माग्छौं हामी,
बार्गेनिङ यति गर्छौं कि
थकित भएर अन्त्यमा बीसमा किन्छौं।
यस्तो घटिया चरित्र छ हाम्रो।
